आला दिन हा सौख्याचा , लक्ष लक्ष दीप उजळू दे .
सुमनांच्या लावा माळा , सुवास तो आसमंती भरू दे ,
आठवणींच्या हिंदोळ्यावर ,स्वर होऊनी मन ते झुलू दे ,
वाडा आपुला साक्षीला , सोहळा हा कौतुके पाहू दे ,
साजरे झाले आनंदपर्व , वाड्याने सर्व ते पहिले ,
क्षण काही दुःखाचे पण , आले नि रडवूनी गेले ,
आज तुझ्या भोवतीने, फेर धरिती लेकुरे ,
बालपण आठवते आमुचे , वाटते व्हावे पुनः लहानगे ,
सांगाव्यास तू कहाण्या , तिन्हीसांजेला बसुनी अंगणामध्ये ,
आम्हीही त्या ऐकाव्या , होऊनी तन्मय झोक्यासंगे ,
न्हाउनी निघाले असेल ,मन ते आठवणींने तुझे ,
तुज कडून ऐकण्यास त्या , मन आमुचे हि आसुसले ,
शतदीपांची ती दीपमाळ , सदैव अशीच तेवू दे ,
मांगल्य फुलांच्या सुवासाने , वाडा तो घमघमू दे ,
असेच सण , अशीच दिवाळी , साजरी होवो वर्षानुवर्षे ,
प्रेमळ तुझा तो हात , आमुच्या शिरी असाच राहू दे.
अल्पना लेले
नोव्हेंबर २०१३
